ملف لمفرزنات رمضان

بسم الله وعلى بركة الله

راح نبدأ بمفرزنات رمضان وتجهيزاته

بصراحه فكرة الفرزنه مره مريحه برمضان ومن ناحية تغير الطعم ابد مايتغير بس فيه حاجات ابد ماحبيت فكرة انها

تتفرزن مثل المعجنات لان مره تتخمر وتطغى ريحة الخميره وطعمها على العجين 

فاقتصرت التفريز على (السمبوسه والسبرنق رول وهالحاجات هاذي...

*الاصناف اللي فرزنتها :

سمبوسه

سبرنق رول

كبه

أقراص التوست

قطايف

اصابع الجبن

سمبوسة بف

صوص البيتزاء

نبدأ بسم الله بطريقة عملهم

(ماشاء الله لاقوة الا بالله)

*القطايف *

مقادير العجينه:

2 كأس دقيق
1/2 ملعقه صغيره بيكنج بودر
1/2 ملعقه صغيره ملح
1 ملعقه صغيره سكر
1 ملعقه كبيره حليب بودره
1 ملعقه كبيره خميره
2 ملعقه كبيره سميد
2 كأس ماء دافئ

الطريقة:
تخلط جميع المقادير ماعدا الدقيق ثم نضيف الدقيق ونخلط حتى تتكون عجينه شبه سايله نفس تقريبا عجينة الكيك
وتتخمر لمدة نص ساعه او ساعه كامله
نحضر التاوه او الصاج ونحميه والافضل تستخدمين تيفال وتكون النار وسط
ولاتعلين عليها علشان ماتحترق بسرعه
ونبدأ نصب بالطريقة اللي تعجبك وتريحك
ننتظرها تطلع الفقاعات على الوجه وتنشف وتتحمر من تحت بكذا تكون جاهزه
ثم تحشينها بجبن كيري او مكسرات حسب الرغبه
وتغلق ثم تقلى وتشرب بالشيره
اترككم مع الصور:
هنا استخدمت آلة المصابيب على الكهرب مره مريحه
والعجينه صبيتها بهالكاس وفيه فتحه من تحت 

هنا صبيتها وواضحه الفقاعات

حطيت القطايف بكيس علشان تبقى طريه واقدر اسكرها

بعد ماانتهيت من الحشو والحين جاهزه للفرزنه ثلجيها ثم وزعيها بالاكياس افضل شي الاكياس اللي
تنسكر من فوق تشوفونها بالصور النهائيه للمفرزنات^^

وهنا مع فنجال قهوه ^^

وبالعافيه..

*أصابع الجبن

طبعاً أصابع الجبن معروفه عجينة سمبوسه تحشى جبن وتلف على شكل اصابع

*السبرنق رول
بعد معروف بس راح انزل صور لتوضيح
الحشوه حسب رغبتك

هنا التغميس استبدلت البيض بحليب ثقيل شوي 

جاهز للفرزنه^^

*أقراص التوست

سهله واتوقع الكل عارفها
هذا رابط لطريقتها

http://www.m0dy.net/vb/t293541.html


*الكبــــــه

المقادير:
-كميه متساويه من البرغل واللحم
يعني كأس برغل معه كأس لحم مفروم وهكذا
حبة بصل صغيره او حسب الكميه
-اغسلي البرغل ثم نقعيه بمويه 10دقايق او ربع ساعه ولاتكثرين المويه علشان مايطلع البرغل لين بقوه
-صفي المويه عن البرغل اذا كان فيه مويه
-وصفي اللحمه بعد لايكون فيها سوائل
-الحين اخلطي البرغل واللحم مع بعض وافرميهم بفرامة اللحم وافرمي البصل معهم
-ارجعي افرمي الخليط مره ثانيه وثالثه لحد ماتتكون عجينه تقدرين تشكلينها
-ثم حطي عليها (ملح وفلفل وبهارات كثري البهارات شوي بتطلع طيبه اكثر^^)
-وأبدي بسم الله شكليها نفس شكل الكبه المعتاد
-علشان ماتتفتح معك الكبه بالزيت عندي سر صغنون^^
أخذته من النت الله يجزي صاحبته خير(نشا ذوبيه بمويه)وامسحي الكبه فيه
من جربته ماشاء الله لاقوة الا بالله ماتفتحت معي
(اللي تجربه وتنفتح معها رجاء بلا دعاوي^^يمكن السبب يكون راجع لعجينة الكبه ماتكون ضابطه معها)
وان شاء الله تضبط معكم^^
-القلي اقلي الكبه بزيت دافيء مايل للحراره يعني لايكون حامي مره
لو كان مسخن بقوه راح تتحمر بسرعه وتبقى طريه من داخل ومو هذا اللي نبيه
-اخليكم مع الصور:

بعد ماخلصت من التشكيل وجاهزه للفرزنه وارجع اقول ثلجيها قبل توزعينها بالاكياس
يعني دخليها بالفريزر زي ماهي بصحنها تتجمد ثم حطيها بالاكياس
لان راح يخرب شكلها لو حطيتيها طوالي بالكيس^^

بعد القلي ماشاء الله

وبالعافيه على قلوبكم^^

*سمبوسة البف

هالسمبوسه ماشاء الله لذيذه اخذت طريقتها من شيف بقناة فتافيت واعتمدتها
وبسم الله

المقادير:
200 غ زبده ذايبه (اصبعين)
1 كغ دقيق (يعني 1 دقيق الكويت كامل)
رشة ملح
200 ملي ماء (اتوقع  مقاش بيالة شاي)بس قيسي بالملي تأكدي

الطريقة:
-اعجني المقادير كلها مع بعض وغطيها وخليها ترتاح بالثلاجه نص ساعه او ساعه كامله
ثم شكليها حسب رغبتك
-القلي نفس طريقتنا بقلي الكبه لانه عجين ويحتاج وقت ينضج

-التوضيح بالصور^^

صوره للعجينه

راح نحتاج لطحين نرش العجينه فيه وفوطه مبلوله بشوي ماء اذا فردتي العجينه تغطينها فيه
علشان ماتجف عليك العجينه وانتي تشتغلين

ونسيت اصورها بعد القلي بس الحمدلله لقيت صوره قديمه من الارشيف^^

*صوص البيتزاء

نحتاج لطماطم معلب اخلطيه بالخلاط
شوي ثوم مفروم كشنيه بزيت زيتون ثم حطي عليه الطماطم
والملح والبهارات والفلفل ومعجون طماطم وماجي الابيض
وشوي سكر يعدل طعم حموضة الطماطم والمعجون
خليهم على النار يتبخر الماء ونحصل في الاخير على صوص ثقيل
اخليكم مع الصور^^

وهاذي النتيجه وزعتها بعلب وعلى الفريزر ^^

*الشيره

جهزت كميه من الشيره وحفظتها بعلبه بالثلاجه 

وهاذي طريقتي:
2كأس سكر
1كأس ماء اذا تبينها ثقيله مره نفس العسل اذا تبينها اخف شوي زيدي 1/2كأس ماء
ربع ليمونه اعصريها وحطي القشره بعد
وعدد من حبات الهيل الصحيح
وزعفران 
خليها على نار عاليه اذا بدت تطبخ هدي عليها النار وخليها لمدة ربع او ثلث ساعه
وخليها تبرد وحطيها بالعلبه

*صورللمفرزنات

الكبه بالصينيه انتظرها تتجمد^^
باقي الاكياس تحت بس انا طلعت لكم من كل نوع كيس لتوضيح^^

لاحظو الاكياس اللي قلت لكم عنها شاريتها اختي الله يجزاها خير من ايكيا حجمين بكرتون واحد
وفيه نوعيه ثانيه اتوقع من العثيم او بنده بس ايكيا افضل وكيستها اثقل

تم بحمدلله اتمنى انه يعجبكم وتستفيدون منه 
لاتنسوني من دعواتكم
واي ملاحظه او استفسار انا بالخدمه

والقادم افضل بإذن الله